Главная | Мой профиль | Выход | RSSПонедельник, 19.11.2018, 03:18

МБОУ "Кептинская СОШ"

Меню сайта
Форма входа
Поиск
Главная » 2016 » Декабрь » 7 » Кэптин орто оскуолатын 85 сылын бэлиэтиир өрөгөйдөөх үбүлүөйэ
12:32
Кэптин орто оскуолатын 85 сылын бэлиэтиир өрөгөйдөөх үбүлүөйэ

Сырдык аартыгынан 85 сыл

Кэптин орто оскуолатын 85 сылын бэлиэтиир өрөгөйдөөх үбүлүөйүттэн бэлиэтээһиннэр

Маалтааны нэһилиэгэр маҥнайгы үөрэх кыһата Эбэбит кэрэ кытылыгар Быһыттаах учаастагар 1931 сыллаахха тэриллэн нэһилиэк ыччатын сырдык аартыгынан сиэппитэ быйыл 85 сылын бэлиэтиир үбүлүөйдээх тэрээһин 2016 сыл ахсынньы 3 күнүгэр өрө күүрүүлээхтик, үрдүк таһымнаахтык ыытылынна. Сарсыарда 10 чаастан саҕалаан бырааһынньыктыы киэргэммит оскуола дьиэтигэр ыраахтан-чугастан күндү ыалдьыттар тоҕуорустулар. Оскуоланы урут бүтэрбит выпускниктар, үлэлээбит учууталлар, ыалдьыттар кылаас чаастарыгар киирэн оскуолатааҕы сылларын, бэйэлэрин ситиһиилэрин туһунан билиҥҥи үөрэнээччилэргэ ирэ-хоро кэпсээтилэр, сүбэ-соргу кээстилэр.

11 чаастан оскуола спортсаалатыгар «Үбүлүөйгүнэн, үөрэммит оскуолам!» үөрүүлээх линейка бочуоттаах ыалдьыттар, үлэлээбит учууталлар, Кэптин начаалынай, сэттэ, аҕыс кылаастаах уонна орто оскуолатын  араас сылларга бүтэрбит выпускниктар парадтарынан аһылынна. Кэптин аҕыс кылаастаах оскуолатын 1966 сыллаахха бүтэрбит «Кыһыл көмүс» выпускниктарга кылаастарын салайааччыта ветеран учуутал Павлов Николай Петрович аалай лиэнтэни баайбыта линейка биир долгутуулаах түгэнинэн буолла. Үөрүүлээх линейка бэлиэ түгэнинэн олоҕун оҕону иитиигэ анаабыт Саха АССР үтүөлээх учууталыгар Петр Дмитриевич Егоровка – Дьөгүөрэп учууталга өйдөбүнньүк дуосканы үөрэнээччилэрэ – техническэй наука доктордара Чемезов Егор Николаевич, Заровняев Борис Николаевич арыйыылара буолла. Өйдөбүнньүк арыллыытыгар Учуутал төрөппүт кыыһа Розалия Петровна Заровняева, сиэнэ Анна Радомировна Егорова махтал тылларын эттилэр, оскуола үбүлүөйүнэн эҕэрдэлээн, бэлэх туттардылар.

«Сырдык аартыгынан 85 сыл» үбүлүөй үөрүүлээх чааһа кулууп дьиэтигэр 2 ч. чаастан «Дьиэрэй» ансамбль (сал. С.С. Александрова) «Взвейтесь кострами» ырыатынан, кыра кылаас үөрэнээччилэрин эҕэрдэ хоһооннорунан саҕаланна. Салгыы Кэптин орто оскуолатын үбүлүөйүнэн анал ааттары иҥэрии сэрэ-туома ыытылынна. “Энтузиаст учуутал” анал аат үлэлээбит кэмнэригэр бэйэлэрин суолларын-иистэрин оскуола историятыгар хаалларбыт бэтэрээн учууталларга Павлов Николай Петровичка, Сидоров Афанасий Иннокентьевичка, Скрыбыкин Степан Спиридоновичка, Николаев Василий Игнатьевичка, «Ирдэбиллээх салайааччы» анал аат оскуоланы өр кэмҥэ салайан саҥа таһымҥа таһаарбыт тумус туттар дьоммутугар Павлова Федора Герасимовнаҕа, Потапова Парасковья Кононовнаҕа, Варламов Николай Прокопьевичка, «Маҥнайгы учуутал» - элбэх көлүөнэ оҕону билии аартыгар сирдээн киллэрбит кыра кылаас учууталларыгар Терютина Евдокия Алексеевнаҕа, Заровняева Розалия Романовнаҕа, Чемезова Марта Никаноровнаҕа, Стручкова Софья Иннокентьевнаҕа уонна «Оскуола өрөгөйүн ырыатын ааптара» анал аат оскуола выпускнигар СӨ үөрэҕириитин туйгунугар Николай Федорович Максимовка ытыс тыаһын ортотугар иҥэрилиннилэр.  Оскуолабыт киэн туттар выпускнига Саха Өрөспүүбүлүкэтин Бырабыытылыстыбатын бэрэссэдээтэлин солбуйааччы, Тыа хаһаайыстыбатын уонна ас-үөл политикатын миниистирэ Петр Николаевич Алексеев оскуоланы үбүлүөйүнэн эҕэрдэлээн, үөрэппит учууталларыгар махтанан туран, Үөрэх министерствотыттан оҕону таһар анал массыынаҕа мэктиэ сурук, Тыа хаһаайыстыбатын министерствотыттан тыа хаһаайыстыбатын техникатын атыылаһарга 500 тыһ., Спорт министерствотыттан спортинвентарьга 200 тыһ. сертификаттары туттаран, үөрүүбүт үрдээтэ. Салгыы «Горнай улууһа» муниципальнай оройуон баһылыга Никита Викторович Андреев, Горнай улууһун үөрэҕин управлениетын начаалынньыгын солбуйааччы оскуола выпускнига Михаил Петрович Михайлов оскуолаҕа бэлэхтэрин сэргэ бастыҥ учууталларга, оскуола үлэһиттэригэр муниципальнай, ведомственнай наҕараадалары туттардылар. Ол курдук «Улуус сайдыытыгар кылаатын иһин» түөскэ кэтиллэр бэлиэнэн нуучча тылын уонна литературатын муҥутуур үрдүк категориялаах учуутала Раиса Иннокентьевна Тимофеева, «СӨ үөрэҕириитин туйгуна» бэлиэнэн уруһуй уонна технология муҥутуур үрдүк категорялаах учуутала, «Уран» муода студиятын салайааччыта Татьяна Ильинична Лукавина, СӨ Үөрэх министерствотын Бочуотунай грамотатынан муҥутуур үрдүк категориялаах кыра кылаас учуутала Марта Никаноровна Чемезова, Үөрэх министерствотын Махтал суруктарынан омук тылын үрдүк категориялаах учуутала Диана Афанасьевна Чемезова, саха тылын уонна литертуратын эдэр учуутала Алена Иннокентьевна Григорьева наҕараадаланнылар. Үөрүүлээх чаас долгутуулаах түгэнинэн ыраахтан ыҥырыллан кэлбит ытык-мааны ыалдьыттарга «Маалтааны нэһилиэгин Бочуоттаах олохтооҕо» бэлиэни баһылык Валерий Николаевич Дьяконов туттарыыта буолла. Тупсаҕай оҥоһуулаах бэлиэнэн мустубут дьон-сэргэ ытыстарын тыаһынан нэһилиэк дьонун ытыктабылларынан ылбыт бэтэрээн учууталлар - 92 саастаах ытык кырдьаҕас 1966-67 сылларга директорынан үлэлээн, саҥа оскуола дьиэтин туттарбыт Наум Трифонович Слепцов, олоҕун оҕону иитиигэ анаабыт, бастакы уон сылын Кэптин аҕыс кылаастаах оскуолатыгар үлэлээн, үс кылаас бастакы учууталынан – иккис ийэтинэн ааттыыр, махтанар, билигин Чурапчы Мугудайыгар олорор Россия норуотун үөрэҕириитин туйгуна, педагогическай үлэ ветерана Евдокия Алексеевна Терютина, түөрт уон сыл оскуолаҕа ол иһигэр сүүрбэ сыл солбуга суох дириэктэри үөрэх чааһыгар солбуйааччынан үлэлээбит Саха республикатын үөрэҕин үтүөлээх үлэґитэ, Саха республикатын педагогическай үлэтин бочуоттаах бэтэрээнэ Парасковья Кононовна Потапова уонна оскуола киэн туттар выпускнига техническэй наука доктора ХИФУ Хайа институтун директора Борис Николаевич Заровняев наҕараадаланнылар.

Салгыы үөрүүлээх үбүлүөйүнэн улуус, нэһилиэк тэрилтэлэригэр, выпускниктарга аһаҕас микрофон биллэрилиннэ. Манна техническэй наука доктордара Чемезов Егор Николаевич, Заровняев Борис Николаевич кэс тыллырын этэн, үөрэппит учууталларыгар алмаас кыырпахтаах бэлэхтэри, ХИФУ ректорын Бочуотунай грамоталарын оскуола иитэр үлэҕэ дириэктэри солбуйааччытыгар Алена Николаевна Григорьеваҕа, учуутал Татьяна Ильинична Лукавинаҕа, ХИФУ-ка үлэлиир выпускниктарбыт ааттарыттан оскуолаҕа проектор, психологическай наука кандидата Феврония Ивановна Алексеева «Кыһыл көмүс» выпускниктар ааттарыттан биология химия кабинетыгар моноблок, хас да сыл кыра кылаас учууталынан таһаарыылаахтык үлэлээбит, оҕо сайыҥҥы сынньалаҥын тэрийбит Марианна Яновна Артемьева технология кабинетыгар ЖК телевизор туттарыылара дохсун ытыс тыаһынан доҕуһуолланна.

Үөрүүлээх тэрээһини оскуола коллективын, нэһилиэк уус-уран самодеятельноһын кыттыылаахтарын күүһүнэн эҕэрдэ кэнсиэр түмүктээтэ. Кэнсиэри эдэр учуутал Марфа Васильева уонна СӨ культуратын туйгуна, Ньурба тыйаатырын артыыһа Прокопий Федоров үрдүк таһымнаахтык салайан ыыттылар.

«Ааспыты ахтыһыах, умнубуту санаһыах» көлүөнэлэр көрсүһүүлэригэр бары ыалдьыттар, араас сылга бүтэрбит выпускниктар кылаастарынан түмсэн, тупсаҕайдык киэргэммит саалаҕа өлгөм астаах остуол тула муһуннулар. Тэрээһини оскуола выпускниктара Лена Григорьевна Саввинова, Прокопий Давыдович Федоров сэргэхтик салайан, бииртэн биир ыалдьыттар, кылаастар эҕэрдэлэрэ иһилиннилэр, бириистээх оонньуулар ыытылыннылар, ырыа-үҥкүү эҥэрдэстэ.  Оҕо-эдэр сааһы эргитэр, оскуолаҕа, учууталга махталынан туолбут истиҥ көрсүһүү оһуокайынан түмүктэннэ. Ыраахтан кэлбит ыалдьыттар, выпускниктар бэйэ-бэйэлэрин кытта көрсөн, ахтылҕаннарын таһааран, астынан тарҕастылар. Бары бөлөҕүнэн да, биирдиилээн да сөбүлээн хаартыскаҕа түһэр сирдэринэн оскуолаҕа үлэлээбит, манна олохторун холбообут учуутал дьиэ кэргэн Инга, Антон Константиновтар бэлэхтэрэ – «Мин Кэптин оскуолатын таптыыбын» баннердара буолла.

Ыраахтан-чугастан үбүлүөй үөрүүтүн үллэстэ кэлбит үлэлээбит учууталларга, үөрэммит оҕолорго эҕэрдэ тылларгыт, бэлэхтэргит иһин оскуола коллективын, үөрэнээччилэрин аатарыттан барҕа махтал тылларын аныыбыт, эһиэхэ барыгытыгар дьолу-соргуну, таһаарыылаах үлэни, тулахадыйбат доруобуйаны баҕарабыт!

Түгэнинэн туһанан, маннык дьоһуннаах тэрээһини үрдүк таһымнаахтык ыытарбытыгар күүс-көмө буолбут нэһилиэк дьаһалтатыгар, чуолаан Валерий Николаевич Дьяконовка, Альбина Семеновна Алексееваҕа, оҕо саадын (Скрыбыкина С.П.), сынньалаҥ дьиэтин (Дьяконова Л.Г.), балыыһа (Агеева Н.П.) иллээх коллективтарыгар, «Эрчим» нэһилиэк ыччатын түмсүүтүгэр (Налесник И.Н.), нэһилиэк олохтоохторугар, түөлбэ салайааччыларыгар уонна спонсордарга: Саха Өрөспүүбүлүкэтин «Азия оҕолоро» норуоттар икки ардыларынааҕы спортивнай оонньуулар дирекцияларын салайааччытыгар, нэһилиэк кураторыгар Владимир Владимирович Максимовка, ХИФУ-ка үлэлиир оскуола выпускниктарыгар техническэй наука доктордара Егор Николаевич Чемезовка, Борис Николаевич Заровняевка, ХИФУ проректора Герасим Николаевич Павловка, Андрей Иванович Васильевка («Прогресс» маҕаһыын), биир дойдулаахтарбыт Зинаида Ивановна Чемезоваҕа («У Зины»), Ирина, Кирилл Иванович Алексеевтарга (“Эргис” ХЭТ) муҥура суох махталбытын тиэрдэбит, тус олоххутугар дьолу-соргуну баҕарабыт, оҥорор үтүө дьыалаҕыт уон оччонон эргийдин диэн алгыспытын аныыбыт.

 

 

Просмотров: 259 | Добавил: kepschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Обратная связь
Наши контакты:
Телефон: +74113129323 +74113129374(9:00-13:00 14:00-18:00)
E-mail: kepschool@mail.ru
форма обратной связи
Друзья сайта
Центр мониторинга качества образования Федеральный институт педагогических измерений Министерство образования и науки РС(Я) Сетевой город. Образование
Статистика

Онлайн всего: 1
Гостей: 1
Пользователей: 0

Copyright MyCorp © 2018
Конструктор сайтов - uCoz